B. L. IVLIEN DAVID DU PERRON, natif de Sainct Lo en Normandie, homme for docte, grand Theologien, Philosophe, Mathematicien & Medecin &c. (pere de Jaques David du Perron, duquel nous avons fait tant honorable mention cy devant) &c. Il a escrit quelques discours tres-doctes, touchant les fontaines & leur origine, avec plusieurs beaux secrets sur cette matiere. Il a davantage escrit un traicté de la maladie des goutes (duquel mal il estoit for travaillé durant sa vie) lequel traicté est si docte, que les plus sçavants medecins sont contraints d'attester, qu'ils n'ont rien veu ou leu escrit de plus docte sur cette matiere par les anciens medecins. Ces livres ne sont encores en lumiere: quand il plaira à son fils de les faire imprimer, ensemble plusieurs autres que sondit pere a escrits sur plusieurs differents subjects, il fera paroistre combien ce luy est d'honneur, que d'avoir eu pour pere & precepteur tout ensemble, un si grand & docte personnage qu'estoit ledit Julien David du Perron. Il mourut à Paris l'an 1583. âgé de cinquantecinq ans ou enuiron.