B. L. FRANCOIS DE LA CROIX-DU MAINE sieur dudit lieu & de la Vieille-cour, à quatre lieües de la ville du Mans, autheur de ceste Bibliotheque Françoise, &c. Tous les autheurs tant anciens que modernes, lesquels ont escrit les catalogues des escrivains, ou facteurs de quelques ouvrages, ont tousjours fait mention de leurs escrits, quand celà est venu en leur rang, & pour mon regard, afin d'advertir ceux qui verront ce mien oeuvre, des escrits que j'ay jusques icy elabourez, sans les avoir encores mis en lumiere, je veux bien qu'ils sçachent, que je n'en desire pas mettre icy le catalogue ou denombrement, que j'ay fait imprimer il y a cinq ans, & lequelje delibere de faire voir encores sur la fin de ce mien abregé de Bibliotheque, à fin que ceux qui desireront sçavoir quelles sont noz entreprinses, les voyent tout à leur aise. Et pour dire en un mot quelles oeuures j'ay faites, ou bien quelles sont mes entreprises, que ceux qui liront cecy s'asseurant qu'il n'y a subject ou matiere au monde, cogneüe des hommes, de laquelle je n'aye escrit, ou recueilly memoires, jusques à avoir amassé huit cent volumes de Memoires & Recueils de toutes façons, contenant vingt cinq ou trente mille cayers de matieres differentes, esquels il y a plus de treze ou 14. mil fueilles escrites de ma main & n'appelle point fueille s'il n'y a cent lignes, & n'appelle point ligne s'il n'y a dix ou douze syllabes, ce que je ne veux alleguer pour une arrogance, car c'est ce que j'ay le plus en horreur, mais je le fay pour prevenir en celà ceux qui ayans ouy parler des volumes de ma Bibliotheque penseroient que ce ne fussent que papiers blancs, ou livres d'attente, entre lesquels il y en a plus de quatre ou cinq cens escrits à la main, d'autre main que la mienne, desquels j'ay fait par cy devant assez ample mention, tant en mon Discours imprimé l'an 1579. qu'en celuy que je presentay au Roy l'an 1583. lesquels pour ne s'estre venduz publiquement je feray imprimer sur la fin de l'Abregé de cette Bibliotheque, afin, de satisfaire à plusieurs qui ne les ont encor'veuz, combien que je sois tout asseuré que le premier a esté leu par plus de dix mille hommes de nation Françoise ou estrangers, mais la promesse contenue en iceluy, s'est trouvee tellement surpasser les forces humaines, qu'ils ont pensé que ce n'estoient que des idees ou imaginations, ce qui les a empeschez d'entendre à m'envoyer des Memoires, pour parachever cette Bibliotheque, se persuadans que ce n'estoit qu'une entreprise sans enpouvoir jamais voir l'effet sortir en evidence: je parleray de cecy autre part.