B. L. JEAN IMBERT, natif de la ville de la Rochelle pres Bordeaux, licentié és droicts, Advocat au siege de Fontenay le Conte, en Poictou. Il est autheur du livre vulgairement appellé l'Enchiridion ou Manuel d'Imbert: auquel livre est expliquee la pratique du droict gardé & observé en France, & aussi du droict non escrit, c'est à dire aboly par les coustumes. Il a esté imprimé par une infinité de fois, tant il a esté bien receu. Je ne sçay si ledit Imbert l'a escrit en François, comme je sçay qu'il la composé en Latin, car nous avons la traduction d'iceluy faite par Nicolas Theveneau &c. imprimee à Poictiers & autres lieux, comme nous dirons cy apres. Ledit Imbert a traduit de Latin en François, la paraphrase du premier livre de ses institutions Forenses, autrement intitulé la pratique Judiciaire, imprimee à Paris par Symon de Colines ou Colinet, & depuis imprimee l'an 1566. Guillaume Lymandas, Conseiller du Roy à Lyon, les a aussi traduites for fidellement, comme nous avons dit cy dessus.