B. L. GUILLAUME AVBERT, natif de la ville de Poitiers, homme for docte & des plus eloquents de la Cour, premierement Advocat au Parlement de Paris, & maintenant Advocat du Roy aux Generaux. Il a escrit l'histoire de la terre Saincte, conquise par les Chrestiens, sur les Barbares, soubs la conduite de plusieurs Princes & grands Seigneurs de France, imprimee l'an 1562. à Paris à l'enseigne de la Concorde. Il avoit entrepris de recueillir en un beau corps d'histoire, tout ce que les Rois, Princes & peuples de France avoyent jamais fait de memorable, en temps de guerre & en temps de paix, tant par mer que par terre, soit en leurs pays, ou és contrees estranges, & fist entendre cette sienne deliberation au feu Roy de France Henry second du nom, & à plusieurs autres Princes & grands seigneurs de sa Cour, dont cette histoire susdite est comme un essay, mais son offre ne fut pas acceptee. Il avoit aussi deliberé de poursuivre l'histoire de France, suyvant & à l'jmitation de ce qu'il a mis en lumiere de l'histoire de la terre Sainte. Il a traduit d'Espagnol en François le douziesme livre d'Amadis de Gaule, imprimé à Paris par Jean Longis & Robert le Mangnier l'an 1560. Il a escrit une bien docte oraison de la paix, & les moyens de l'entretenir, & qu'il n'y a raison aucune, suffisante pour faire prendre les armes aux Princes Chrestiens, les uns contre les autres, imprimee à Paris chez Vincent Sertanas l'an 1559. Il florist à Paris cette annee 1584. âgé de 50. ans ou environ.