B. L. JAQUES MORIN de Loudon sieur dudict lieu, & du Tronchet au Maine, Conseiller du Roy, en son Parlement de Paris, gentilhomme des plus curieux d'antiquitez & sur tout des genealogies & alliances des maisons nobles de France qu'autre de son temps, comme il a monstré par le livre des alliances de sa tres-illustre & tresancienne maison, commençant dés l'an de salut 1180. jusques au regne du Roy Henry 2. soubs lequel il florissoit: ce livre n'est encores imprimé. Cestuy cy estoit frere puisné de Guy Morin de Loudon, duquel nous avons parlé cy devant en son rang. Et diray encores que le sieur de Loudon, lequel fut tué devant la Rochelle l'an 1573. soubs le regne de Charles 9. estoit son fils aisné. Et par honneur je nommeray Madame de Seronuille en Beaulse sa fille aisnee, laquelle il a fait tellement instruire aux lettres Grecques & Latines, qu'elle merite d'estre nombree entre celles qui honorent la France par leurs divins esprits.