B. L. ODET TVRNEBE, OU TOURNEBV, & selon autres de Tourneboeuf, natif de Paris, fils aisné de ce tant renommé Adrian Turnebe dit Turnebus & de Magdeleine Clement sa femme &c. jeune homme, lequel ne degeneroit en rien du sçavoir de son pere: car il avoit for bien estudié, & apris beaucoup de langues, & de bonnes disciplines, suyvant l'instruction qu'il avoit euë de defunt son pere, & de plusieurs doctes hommes ses precepteurs, entre autres d'Antoine Valet Lymosin, docteur en medecine à Paris, (lequel je nomme par honneur.) Iceluy Odet Turnebe a escrit plusieurs vers Grecs, Latins & François, desquels il y en a quelques uns, avec le recueil des poëmes faits en diverses langues, sur la pulce de madame des Roches de Poictiers, &c. Quant à ses autres compositions je n'en ay pas cognoissance. Il fut premierement Advocat en la Cour de Parlement, & en fin il sut pourveu de l'estat de premier President en la Cour des Monnoyes à Paris, à la poursuite duquel estat il mourut d'une fiebvre chaude l'an 1581. aagé de 28. ans, 8. mois & 28. jours. Il se voit un recueil d'Epitaphes en plusieurs langues, composez sur sa mort, par les plus doctes hommes de France, lequel a esté imprimé à Paris chez Mamert Patisson l'an 1582. Il estoit frere aisné d'Estienne Turnebe, Conseiller en Parlement, & d'Adrien Turnebe 2. du nom, duquel nous avons parlé cy dessus, à la lettre A, tous trois for doctes és langues, & bien sçavans en la jurisprudence.