B. L. NICOLAS PAVILLON Parisien, Advocat au Parlement, homme docte en Grec & en Latin, & excellent Poëte és susdites langues, & en François aussi, comme il se peult voir par plusieurs de ses compositions és langues susdites, & encores par les vers qu'il a escrits sur la mort de Messire Loys d'Amboise sieur de Bussy (duquel nous avons fait si honorable mention cy devant à la lettre L.) Quant au Tombeau ou Epitaphes de Monsieur de Bussy d'Amboise, il ne les a encores fait imprimer, non plus que ses autres oeuvres. Il florist à Paris cette annee 1584.

B. L. NICOLAS PAVILLON OU PAVILLION Parisien, Advocat en Parlement, homme tresdocte, & grand rechercheur des livres antiques. Il a traduit de Grec en François les sentences de Theognide Poëte Grec, imprimees à Paris chez Guillaume Julien l'an 1578. Il florist à Paris cette annee 1584. Nous avons ja fait mention de luy cy dessus, mais nous n'avions encores parlé de cette version faite par luy.