Messire NICOLAS DE NEUF-VILLE, Chevalier des deux ordres du Roy, seigneur de Ville-roy, premier secretaire d'Estat soubs le regne du Roy Henry 3. & auparavant soubs Charles 9. son frere, defunct. Ce seigneur de Ville-roy n'a rien fait imprimer de ses doctes harangues prononcees devant les Majestez des Rois de France ses maistres, non plus que de ses memoires & affaires d'Estat, qu'il a maniees en France, depuis 18. ou 20. ans en ça. Quand sa commodité le permettra, il en fera part à ceux de son siecle, & luy en seront redevables pour le bien & profit qu'ils en recevront. C'est celuy qui a espousé la fille de Monsieur de l'Aubespine Secretaire d'Estat, de laquelle le nom est Magdeleine de l'Aubespine, dame tres-docte (comme nous dirons cy apres faisant mention d'elle en noz additions mises sur la fin de cette Bibliotheque Françoise.) Il y a un autre seigneur appellé de ce nom de Ville-ray, lequel s'appelle Villeray-riant, maistre des requestes de l'hostel du Roy, & fils de feu Monsieur le President Riant (comme nous dirons autre-part, lors que nous ferons mention des escrivains en Latin.) Si j'ay parlé icy bien amplement, ç'a esté pour donner intelligence de ces deux seigneurs, desquels la seigneurie n'est pas beaucoup dissemblable, & afin que lon ne se puisse abuser ou mesprendre en iceux &c. Il florist cette annee 1584. soubs le regne du Roy Henry troisiesme, duquel il est extremément aimé & respecté, pour les bons & aggreables services qu'il a faits & faict encores chacun jour à sa Maiesté.