B. L. JEAN DE MORIN Nantois, sieur de la Soriniere, gentilhomme Breton, President en la chambre des comptes de Bretagne. Il a escrit des Memoires & Recherches, touchant les antiquitez & singularitez de la Bretagne Armorique, lesquels ne sont encores imprimez. Scevole de Saincte Marthe, gentilhomme natif de Lodun en Poictou, fait mention de luy en un Sonet, imprimé avec ses premieres poësies fol. 108. & tesmoigne audit lieu que le Seigneur Morin de Nantes en Bretagne (qui est ledit sieur de la Soriniere) a escrit plusieurs oraisons & poësies Françoises, & entre-autres un discours par lequel il mesprise les biens de fortune. Je n'ay point veu de ses oeuvres imprimees. Il florist cette annee 1584.