B. L. CHARLES DE SAVIGNY, Gentilhomme Rhetelois ou de Rhetel , au diocese de Reims en Champagne, maistre de la Garderobbe de Monseigneur le Duc de Nevers, Prince de Mantouë &c. Il a escrit plusieurs livres en Philosophie, Grammaire & autres sciences touchant l'instruction de la Noblesse, aux arts liberaux &c. il est apres pour les faire imprimer. Il florist cette annee 1584.

B. L. CHRESTOFLE DE SAVIGNY gentilhomme de Rhetel en Champagne. Il a escrit plusieurs beaux & doctes livres, lesquels s'imprimeront en bref à Paris selon que je les ay veuz encommencez, & tailler les figures d'iceux. Il a escrit un for beau & docte livre qu'il a intitulé Onomasticum des mots & dictions de chacune chose, mis par lieux communs. Il ne l'a encores mis en lumiere. Il florist cette annee 1584. Il est maistre de la Garderobbe de Monsieur le Prince de Mantoüe, Duc de Nevers. Nous avons fait mention dudit sieur de Savigny icy dessus, au fueillet 48. auquel lieu il est nommé Charles au lieu de Chrestofle, mais celà sera corrigé à la seconde edition de ce livre.