HENRY DE SAINCT DIDIER gentilhomme Provençal, grand Philosophe naturel & des plus estimez de son temps, pour tirer bien de toutes sortes d'armes, desquelles il a escrit un Traitté pour apprendre l'Escrime, contenant les secrets du premier livre sur l'Espee seule, mere de toutes armes, imprimé à Paris l'an 1573. par Jean Metayer, & Mathurin Chalange, & se vendent çhez Jean Dallier sur le pont S. Michel à la Roze blanche. Il dedia ce livre au deffunt Roy Charles 9. J'ay parlé dudit Henry de sainct Didier icy devant, lors que j'ay fait mention de Guillaume de sainct Didier, d'autant qu'entre ces deux il y a une chose fort digne de remarque, sçavoir est (afin de repeter ce que j'ay dit cy dessus, lequel aucuns n'auront pas leu) que l'un & l'autre ont escrit un livre de mesme subject ou argument, sçavoir est de l'Escrime, & que tous deux avoient mesmes surnoms de S. Didier, tous deux gentils-hommes, & nez en une mesme Province, & n'y a de difference que des temps: car cetuy Guillaume florissoit l'an 1174. & cetuy-cy florist, & est encores vivant cette annee 1584. qui sont quatre cens ans entredeux. Il est apres à faire imprimer d'autres livres touchant sa science de l'Escrime, & encores touchant plusieurs autres beaux secrets de nature, ausquels il employé tout son plaisir.