B. L. Messire JEAN DU THIER chevalier, seigneur de Beauregard, Conseiller du Roy, & l'un de ses secretaires d'Estat, signant en ses finances & commandemens, General du Conté de Blois, &c. Cettuy-cy estoit natif de Sens en Bourgongne, & estoit fils de Olivier du Thier, natif de Ruillé au pays du Maine, comme j'ay apris de Olivier du Thier, son nepveu, excellent Poëte François & Latin, &c. duquel nous parlerons cy apres en son ordre. Ledit sieur de Beauregard estoit homme treseloquent, & des plus entenduz és affaires d'Estat, comme bien l'a tesmoigné le seigneur Pierre de Ronsard, le loüant infiniment en ses oeuvres & poësies Françoises. Il a traduit d'Italien en François les louanges de la folie, qui est un traicté for plaisant, en forme de Paradoxe, imprimé à Poictiers l'an 1566. par les de Marnefs & Bouchets freres. Je n'ay point veu ses autres escrits. Il florissoit soubs le regne du Roy Henry 2. l'an 1550.