JEAN BOVCHET Poictevin, natif de la ville de Poictiers en Aquitaine, Advocat audit lieu, surnommé en plusieurs de ses oeuvresl'Esclave Fortuné, & le traverseur des voyes perilleuses, Poëte François, Historien & Orateur. Il a escrit en vers François, les angoisses & remedes d'amour, imprimez à Poictiers l'an 1537. par les Marnefs, & auparavant imprimé à Paris l'an 1501. & depuis à Lyon par Jean de Tournes l'an 1550. Le chapelet & gouvernement des Princes, contenant cinquante Rondeaux & cinq Ballades, imprimé avec le Temple des Nobles malheureux de Georges Chastelain l'an 1517. Le jugement poëtiq, de l'honneur feminin & sejour des Nobles Dames, imprimé à Poictiers chez les Marnefs l'an 1533. Le conflict ou debat du bonheur & malheur, imprimé à Paris chez Denis Janot. Les Regnards traversans, & Loups ravissans. Les Annales d'Aquitaine, qui est un oeuvre extremément laborieux & plein de belles histoires tres-memorables: & afin de repeter le jugement qu'en donne Robert Ceneau, dit Cenalis, Evesque d'Auranches &c. au livre tres-docte qu'il a escrit des François, ce livre des Annales de Iean Bouchet, est l'un des plus dignes que nous ayons entre toutes noz histoires Françoises, & qui merite le plus d'estre traduit en Latin, afin que les estrangers en ayent la cognoissance. Les Epistres familieres & morales dudit Jean Bouchet, imprimees à Paris l'an 1545. in fol. Le labirinth de fortune, & sejour des trois nobles Dames, imprimé à Paris par Philippes le Noir l'an 1533. Deploration de l'Eglise militante, sur ses persecutions. L'Histoire du Roy de France, nommé Clothaire & de Saincte Radegonde sa femme, presentee à la Roine de France par l'autheur. Les genealogies des Rois de France, tant anciennes que modernes, avec leurs epitaphes &c. imprimees à Paris chez Galiot du Pré l'an 1536. & auparavant. Il a traduit de Latin en François, l'histoire de Justin Martir autheur Grec. Le Panegyriq du chevalier sans reproche, traictant de la vie, moeurs & faits d'armes de Messire Loys de la Trimouille, Chambellan du Roy de France, imprimé à Poictiers par Jaques Bouchet l'an 1527. Le Palais & Epigrammes des Claires Dames, qui est un traicté à la louange de la Roine mere du Roy François premier. Le Temple de bonne renommee, & repos des hommes & femmes illustres, imprimé à Paris chez Galiot du Pré l'an 1516. La forme & ordre de plaidoirie, en toutes les Cours Royalles & subalternes du Royaume de France, redigees par coustumes, stiles & ordonnances Royalles &c. avec la forme & maniere d'expedier les criminels, imprimee à Paris par Jean Ruelle. Les triomphes de la noble & amoureuse Dame. Les Cantiques de l'ame devote. Le debat d'entre la chair & l'esprit. Exposition du Psalme de David, qui se commence Miserere mei Deus. Contemplations & oraisons à la vierge Marie, à tous les Anges, & Saincts de Paradis. Traicté de l'amour de Dieu. Il a composé plusieurs autres oeuvres, lesquels je n'ay pas veuz. Il florissoit à Poictiers soubs le regne du Roy François 1. l'an 1530.