FRANCOIS BOVCHARD, gentilhomme ordinaire de la chambre de Monsieur, frere du Roy, &c. Ce seigneur Bouchard est bien versé en Grec, en Latin, & en François aussi, comme il a bien monstré par plusieurs doctes harangues, qu'il a prononcees devant Messieurs les Electeurs de l'Empire, à la creation & coronnement de l'Empereur des Romains, Rodolphe 2. du nom: & encores devant les Roys de France, les Roines de Navarre, & Angleterre, & en plusieurs autres lieux, esquels il a esté employé pour les service de ses Majestez. Il ne les a encores fait imprimer, non plus que ses Memoires ou recueils de toutes sortes d'histoires memorables, qu'il a extraites de plusieurs bons & anciens autheurs, lors qu'il a fait lecture de leurs escrits: lesquels Memoires il a reduits par chapitres, & lieux communs, pour s'en servir avec plus de commodité. Il florist cette annee 1584. âgé d'environ 50. ans. Il est pere de Jaques Bouchard, natif de Dieppe en Normandie, jeune homme de for grande esperance, pour l'advancement qu'il a és lettres Grecques & Latines, lesquelles il a en partie aprises de monsieur d'Aurat Poëte du Roy, Grec, & Latin, duquel il a esté disciple un long temps.