LEON ADVLPHI OU L'ADVLPHI, qui est un nom contrefait & supposé: car ce n'est qu'un anagramme ou nom retourné de Noel du Faill ou de Phail, escrit par ph, duquel nous parlerons cy apres. Il a escrit estant for jeune, un petit livre plein de faceties & propos joyeux, intitulé Discours d'aucuns propos rustiques facetieux, & de singuliere recreation, imprimé à Paris l'an 1554. par Estienne Grouleau: lequel livre a esté depuis imprimé soubs ce nom, des finesses, ruzes, ou tromperies de Ragot, Prince des Gueux, &c. Il a davantage escrit un traicté qu'il appelle les Baliverneries d'Eutrapel, imprimé il y a for long temps. Il a escrit plusieurs autres livres, pleins de doctrine & consequence, desquels je ne feray pas icy mention: je me reserve d'en parler lors que nous seros à la lettre N, quand ce viendra à ce nom de Noël du Faill, sieur de la Herisaye, &c. & dirons alors ses qualitez toutes au long.

B. L. NOEL DU FAIL, OU DU FAILH, gentilhomme Breton, sieur de la Herisaye en Bretagne, Conseiller du Roy au Parlement de Rennes. Il a mis en lumiere un sien livre qu'il a intitulé, Memoires, recueils, ou extraicts des plus notables & solemnels Arrests du Parlement de Bretagne: le tout contenant 1200. Arrests divisez en trois livres: le premier contient les Arrests donnez en l'Audience, le second ceux des chambres, le tiers est des Meslanges. Ils ont esté imprimez à Renes l'an 1579. chez Julien du Clos. Il a escrit une fort belle & docte histoire de Bretagne non encore imprimee. Il a reduit par lieux communs tout le droit Civil à la suscitation de Eguinarius Baro, & de François Duarin, tous deux Bretons, & des plus renommez Jurisconsultes de nostre temps. Il a escrit (estant encores for jeune d'ans) quelques livres, lesquels il a faict imprimer soubs le nom de Leon l'Adulphi, comme nous avons dit cy dessus. Il a maintenant pris pour sa devise, & Anagramme tout ensemble, ce qui s'ensuit, Fol n'a Dieu. Nous avons faict mention de luy icy dessus à la lettre L. lors que nous avons parlé dudit Leon Adulphi. Il florist à Renes en Bretagne cette annee 1584. & s'il n'estoit detenu du mal des goutes, (qui le travaille & tourmente sans cesse) il feroit bien tost imprimer plusieurs beaux oeuvres de sa façon.