JAQUES DE LAVARDIN, Gentilhomme Vandomois, sieur du Plessis Oroër, & de Bourot en Touraine, issu de la noble maison de Rannay en Vandomois, frere de Messire Jean de Lavardin Abbé de l'Estoille, &c. tous deux tresdoctes & tressçavants personnages, & issuz de la noble maison de Lavardin pres Montoire en Vandomois, (qui est une autre seigneurie differente de celle de Lavardin à six lieuës du Mans, de laquelle les seigneurs s'appellent en leur surnom de Beaumanoir, issuz de Bretagne, comme nous dirons autre-part.) Cette maison de Lavardin est coustumiere de produire des hommes doctes & de toute anciennete. Car Hildebert Evesque du Mans, & depuis Archevesque de Tours, il y a cinq cens ans passez, estoit de cette maison, & portoit ce surnom, lequel a esté de son temps estimé le plus docte Poëte & Orateur, comme tesmoignent ses Epistres & ses poëmes Latins, lesquels nous avons par devers nous escrits à la main, & de divers exemplaires. Et pour tesmoigner de cecy, je repeteray les oeuvres de cetuy-cy nommé Jaques, me reservant de parler du susdit Hildebert autre-part, ensemble de M. Jean de Lavardin, duquel nous ferons mention en son rang. Ledit Jaques de Lavardin a escrit bien doctement & amplement l'histoire des faits & gestes de Georges Castriot dit Scanderbeg Roy d'Albanie, lequel mourut l'an 1467. âgé de 63. ans la plus part de ses guerres furent contre les Turcs. Ce livre a esté imprimé à Paris chez Chaudiere l'an 1576. Il a escrit l'histoire des Turcs, non encores imprimee. Traicté de l'honneste Amour, non ençores imprimé. Il a traduit d'Italien en François la Tragicomedie de Celestine, escrite premierement en langue Espagnolle, imprimee l'an 1578. chez Gilles Robinot. Elle a esté reveuë par l'autheur en la derniere edition, car elle avoit esté imprimee plus de 30. ans au paravant. Il a peu composer de son invention plusieurs autres livres & encores en traduire de diverses langues, desquels je n'ay pas cognoissance pour le present. Il florist ceste annee 1584.