B. L. Messire JEAN DE MONLUC, Evesque & Conte de Valence & de Dye, Conseiller de sa Majesté en son privé conseil, & son Ambassadeur vers les Estats de Polongne, frere de Monsieur de Monluc Mareschal de France soubs Charles neufiesme &c. Ce seigneur est tellement docte & orné d'une telle eloquence, qu'il a esté employé en divers Ambassades pour les Rois de France, François premier, Henry second, Charles neufiesme, & encores dernierement en Polongne pour le service de son maistre Henry troisiesme. Il a escrit deux instructions & trois Epistres, faites & envoyees au clergé & peuple de Valence & de Dye &c. imprimees à Paris chez Vascosan & Federic Morel son gendre l'an 1557. Remonstrances faites par le sieur de Valence, aux villes & dioceses, d'Vzez, Nismes & Montpellier, & aux Estats generaux de Languedoc, tenuz à Beziers au mois d'Auril l'an 1578. &c. imprimees à Paris chez Abel l'Angelier l'an susdit 1578. Il a escrit les harangues faites & prononcees par luy de la part du Roy tres-chrestien Charles neufiesme, en l'assemblee des Estats de la Noblesse de Polongne l'an 1573. imprimees à Paris chez Iean Richier audit an. Il florissoit l'an 1578. Je feray mention de ses escrits Latins autre-part. Quant à ses oeuvres en François, je n'ay veu que les susdits.