B. L. PIERRE PITHOVsieur de Savoye , Advocat au Parlement de Paris frere aisné de François Pithou Advocat audit lieu, & encores de Nicolas Pithou sieur de Champ-Gobert, &c. tous trois natifs de la ville de Troye en Champagne, & issuz d'une treshonorable & bien ancienne famille, & encores qui est plus à loüer) de parents doctes & sçavants, & tellement eloquents que quelques Poëtes modernes ont laissé par escrit que ce nom de Pithou leur avoit esté donné à cause de leur eloquence: voulant faire albusion sur la deesse Pitho: ce qu'a bien remarqué Nicolas de Bourbon de Vandeuvres au pays de Langres, appellé en Latin Nicolaus Borbonius Vandoperanus Lingonensis, &c. au huictiesme livre de ses Poësies. Nous avons parlé cy devant d'un nommé J. Pithou, mais je ne sçay si c'est leur frere, & si cette lettre J. signifie Iean, nous le mettrons en son rang à la seconde edition: car ne sçachant pas qu'il eust non Iean (comme nous avons depuis entendu) nous l'avions mis avec les autres, desquels le nom est doubteux ou incertain, sçavoir est sur la fin de la lettre J. au fueillet 280. Mais pour venir à Parler du susdit Pierre sieur de Savoye, voicy ce que j'ay peuvoir de ses escrits François mis en lumiere. Le premier livre des memoires des Contes hereditaires de Champagne & Brie, imprimez à Paris chez Robert Estienne , & Mamert Patisson, à diverses fois, la premiere impression fut en l'an 1572. Le Catalogue des Evesques de Troye en Champagne, imprimé. Le Catalogue des Contes de Champagne & de Brie, imprimé. Je n'ay point souvenance d'avoir veu autres escrits de luy en nostre langue, & quant à ceux qu'il a composez en Latin, j'en feray mention autre-part. Il florist cette annee 1584.