B. L. MARTIN BASANNIER, OU BASANIER Parisien, jeune homme for docte, & bien versé és Mathematiques, & ayant grande cognoissance de la Theorique & pratique de Musique, lesquelles sciences il a en partie aprises de son industrie, & partie aussi de M. Jean Gosselin garde de la Biblioteque du Roy, son precepteur esdittes sciences. Il a escrit un livre des Ephemerides perpetuelles, du Jour & de la Nuict: reformees depuis l'an de Correction 1582. selon les regles perpetuelles du Calendier Gregorien, & supputees pour la region de France, & plusieurs villes notables d'Europe, imprimees à Paris par Pierre le Verrier, l'an 1583. & se vendent chez Benoist Ravot dit des Spheres. Il a escrit plusieurs beaux secrets touchant la Theorique & Pratique de Musique, observee des anciens, & le moyen de l'avoir pareille en nostre siecle: mais pource que ses livres sont escrits en Latin, j'en feray mention autre-part. Il florist à Paris cette annee 1584. L'Anagramme dudit Basannier est tel, Martinus Basanerius, Musoe nubar in Astris. tourné par monsieur d'Aurat Poëte du Roy, lequel j'ay icy employé pour la rencontre de sa profession.