FRANCOVR, Chancelier du Roy de Navarre &c. voy cy apres Gervais le Barbier, surnommé Francour &c.

GERVAIS LE BARBIER, surnommé FRANCOVR, natif du village de Torcé, à quatre ou cinq lieües de la ville du Mans, premierement advocat en laditte ville, & depuis Chancelier de Roy de Navarre, & en fin Maistre des requestes de l'hostel du Roy Charles 9. l'an 1572. Cetuy-cy a esté l'un des plus adextres à manier les affaires d'estat; qu'autre qui fust de son temps, comme il l'a bien monstré par tous les effects que l'on en a veu produire durant les troubles de France pour la Religion. Il a escrit plusieurs livres, lesquels se voyent imprimez: sçavoir est, La Remonstrance envoyee au Roy, pour la Noblesse du Maine, avec un advertissement de ce qui s'est passé de remarquable audit pays l'an 1564. jusques au mois de May l'an 1565. Le tout imprimé à Orleans audit an. Conseil sacré d'un gentilhomme François, aux Eglises de Flandres, servant d'advertissement aux seigneurs des pays bas, & d'exhortation aux Princes protestants de l'empire, imprimé à anuers l'an 1567. Il a escrit plusieurs memoires des troubles advenuz au Maine touchant le fait de la religion & de la prise de la ville du Mans l'an 1562. &c. lesquels se voyent escrits à la main, & non encores imprimez. Il fut tué à Paris le jour de la S. Berthelemy 24. jour d'Aoust l'an 1572. soubs le regne de Charles 9.