B. L. PIERRE CASTELLAN OU DU CHASTEL, & encores par aucuns nommé Chastellain dit Castellanus, Evesque de Mascon & de Tulles, & depuis pourveu de l'Evesché d'Orleans, en l'an 1544. ou environ, homme tresdocte & des plus estimez de son temps. Il a escrit une treselegante Oraison de l'adolescence & vie du Roy François 1. du nom, qui est comme un brief discours de ses gestes, faits & actions les plus remarquables. Cette Oraison funebre fut prononcee par ledit Evesque le 23. jour de May l'an 1547. tant à Paris en l'Eglise de Nostre Dame, qu'à S. Denis en France. Les susdittes Oraisons ont esté imprimees à Paris par Robert Estienne l'an 1547. Henry Estienne fils dudit Robert, fait mention de cet Evesque en son Apologie pour Herodote en plusieurs endroicts, ensemble Pierre de S. Julien Doyen de Chaalon, en ses antiquitez de Bourgongne au chapitre de Mascon fol. 295. &296. Je feray mention de ses compositions Latines autre-part. Il florissoit en l'an 1547.soubs le regne du Roy François 1. & encores depuis soubs Henry 2. son fils. Voy cy apres Pierre du Chastel.

B. L. PIERRE DU CHASTEL, dit Castellanus, premierement Evesque de Tulles, & depuis de Mascon, & en fin d'Orleans. Il florissoit en l'an 1544. soubs François 1. voy cy dessus Pierre Caststellan.

B. L. Messire PIERRE DU CHASTEL dit Castellanus, Evesque & Conte de Thoul en Lorraine, & selon d'autres de Tules (ce qui est escrit diversement par aucuns autheurs, lesquels l'appellent Castellan ou du Chastel & encores en autres divers noms.) Il estoit Conseiller du Privé Conseil du Roy François 1. du nom, & estoit estimé l'un des doctes hommes de sa Cour. Il a escrit plusieurs oeuvres, lesquelles nous avons recitees cy devant au fueillet 388. & 389. mais ce qui nous a fait repeter cecy de luy, c'est pour la diversité de ses appellations: car telle recherchera en un endroit qui le trouvera en un autre, à raison de l'occasion susditte.