B. L. MICHEL MENOT, docteur en Theologie à Paris, de l'ordre des freres mineurs ou Cordeliers &c. Il a escrit plusieurs volumes de sermons, lesquels il a fait & prononcez, tant en la ville de Paris (en l'Eglise de sainct Iean en Greve) qu'en l'Eglise de Tours en Touraine &c. lesquels se voyent imprimez à Paris chez Claude Chevallon l'an 1525. Ses Expositions sur les Epistres du Caresme, ont esté imprimees à Paris chez ledit Chevallon l'an 1519. & ses sermons de l'enfant prodigue. Henry Estienne en a fait plusieurs extraicts, lesquels il a employez en son Apologie pour Herodote, imprimee par luy l'an 1567. ou enuiron. Et ce qui me fait mettre entre les escrivains François cet autheur susdit, c'est que ses Sermons sont rempliz de mots & dictions Françoises, & de plusieurs autres discours, tellement meslez & entrelacez, que lon peult cognoistre qu'il estoit de nation Françoise, & que ce qu'il avoit ainsi parlé Latin-François, que c'estoit pour se mieux expliquer, & donner à entendre à ceux qui n'avoyent pas cognoissance de la langue Latine. Il florissoit du temps du Roy Loys 12. & au commencement du regne de François premier. Je ne sçay pas de quelle nation il estoit, sinon qu'il estoit François: mais je ne sçay de quelle province de France. Ses oeuvres sont plus recherchees que celles de Olivier Maillard, ou bien de Michel Barlette & autres semblables escrivains, lesquels ont fait des predications si hardies & tellement libres, qu'ils n'ont craint en cela aucun, tant ils estoyent ardents pour annoncer la parolle de Dieu: Et si quelques-uns recherchent leurs oeuvres, par sur tous autres Theologiens de leur temps, c'est pour voir les abuz de tous estats descouverts par iceux plus evidemment, que par les autres predicateurs du temps passé: car ceux-cy ont esté extremément hardis à escrire, & encores plus à prescher en publiq: & n'ont point craint d'employer en leurs livres, les vices qui avoyent cours de leur siecle, afin que lon s'en corrigeast. Ce qui est cause que tant de personnes en sont curieux: & si ils convertissent ou tournent les discours des susdits docteurs en Theologie, autrement qu'en bonne part, celà tournera sur eux, & les scandalizera, & non pas les inventeurs ou autheurs desdits Sermons. Ce que j'ay dit assez amplement, pource que la plus grande partie de ceux qui recherchent les oeuvres des trois autheurs susdits, ne le font que pour s'en penser rire & moquer: mais les bien advisez n'en font pas ainsi: car lon doibt penser au but final & à l'occasion principale qui les faisoit ainsi parler, & au siecle où ils estoyent, & non pas aux discours ou reprehensions couchees en leurs livres, en tels termes qu'il leur a semblé bon de ce faire. Ce que j'ay dit si amplement icy, je l'ay racompté pour beaucoup de raisons: c'est pour faire penser plus d'une fois ceux-là qui donnent si libre jugement des autheurs, (& principalement des oeuvres de Theologie) sans avoir egard de quelles personnes ils parlent, & à quelle consequence peuvent estre tournez leurs propos ainsi vainement prononcez. Si les susdits autheurs ont failly, je ne les veux soustenir: mais je veux juger de tout, en la meilleure part, sans jamais me vouloir declarer par trop affectionné.