JEAN NAGERET, archidiacre & chanoine de l'Eglise de Roüen. Il a fait la description & chronique de Normandie. La description a esté imprimee à Roüen l'an 1578. avecques lesdites chroniques. Ledit Nagerel a compris en ses Annales du pays & Duché de Normandie le catalogue de tous les Archevesques de Roüen, leur vie & le temps auquel ils florissoyent, comme tesmoigne Paschal Robin, sieur du Faux en Anjou, en la vie de S. Romain escrite par luy, & imprimee au troisiesme Tome des vies des Saincts fol. 877. de la premiere edition. Ce que je dy afin que lon ne se trompe au chiffre, si apres elles sont imprimees derechef. Je ne sçay s'il a pris l'extraict de vies des susdits Archevesques, dans la chronique & gestes des Normans, escrite par un Anglois-Saxon nomméOrdericus Vitalis, lequel vivoit en l'an de salut 1070. (il y a cinq cens ans passez) laquelle nous avons par devers nous escrite à la main en for beau stil & tres-elegant pour ce temps-là. Cette histoire est si rare, que mesmement Jean Balee (le plus diligent rechercheur de livres antiques de tout nostre temps) n'en a jamais fait mention en son grand catalogue des escrivains d'Angleterre, ny mesmes Tritemius, Gesnerus, Licosthenes, Symlerus & autres qui ont recueilly les noms des hommes doctes. Nous la ferons imprimer en brief (Dieu aidant) pour le soulagement des studieux & amateurs des bonnes lettres, nous contentans de laisser par escrit qu'elle sera sortie de nostre Bibliotheque, & que par nostre diligence elle aura esté mise en lumiere, comme aussi j'espere faire d'une infinité d'autres, que nous avons recouvrez de toutes parts, avecques de grands frais, cousts & despenses.