B. L. JEAN GALLERY OU GUALLERY, natif de la ville du Mans, oncle de maistre Prothais Coulom Chirurgien, des plus renommez du Maine &c. Cestuy Jean Guallery estoit Poëte François, Philosophe, Mathematicien & bien versé en autres sciences. Il a composé quelques Tragedies, Comedies, & autres poësies Françoises, non encores imprimees. Il fut accusé en fin d'estre magicien, & fut condamné aux galeres. Le livre mis au nom de la Roine de Navarre, intitulé l'Heptameron ou sept journees, fait mention dudit Gallery, & de ce qu'il luy advint. Il estoit principal du college de Justice à Paris, auquel lieu il fist joüer & representer plusieurs Tragedies & Comedies, tant en Latin qu'en François, composees par luy. Ses oeuvres ne sont en lumiere. Il florissoit à Paris soubs le regne de François premier du nom, Roy de France.