B. L. MICHEL DE NOSTRE-DAME, DIT NOSTRADAMVS, docteur en medecine, natif de la ville de Salon de Craux en Provence, frere de Jean de Nostre-dame (duquel nous avons parlé cy devant) & pere de Cesar de Nostre-dame, duquel nous avons aussi fait mention. Ce Michel de Nostre-dame, estoit estimé & à bon droict l'un des plus grands Astrologues de son temps. Il a escrit un nombre infiny d'Almanachs & Prognostications, lesquelles estoyent tellement receuës, & se vendoyent si bien, que plusieurs en ont fait à son imitation, & ont emprunté le nom dudit Nostra-damus, pour qu'elles eussent plus grand vogue & reputation: de façon que s'en trouvans plusieurs mises en son nom (qui estoyent composees par gens ignares, & par consequent pleines de menteries) celà fut cause que plusieurs escrivirent contre luy, entre lesquels fut Antoine Couïllard, sieur du Pavillon pres Loris en Gastinois, lequel a mis en lumiere un livre intitulé les Contre dicts à Nostradamus, imprimez à Paris l'an 1560. chez Charles l'Angelier. D'autre par Estienne Jodelle Parisien, tres-excellent Poëte Latin & François, fist ce distique contre luy, lequel est extremement loüé d'aucuns, pour l'equivoque ou allusion sur les noms &c. Nostra damus, cùm verba damus, nam fallere nostrum est: Et cùm verba damus, nil nisi Nostra damus. Mais tous hommes doctes ne font pas peu d'estime des propheties dudit Nostradamus, entre lesquels je nommeray M. d'Aurat Poëte du Roy, tant estimé de son siecle, lequel est si heureux truschemen ou fidel interprete des Quadrains & propheties dudit Nostradamus, qu'il semble que ce soit le genie dudit autheur, & comme soubs-prophete, appellé des Grecs Hipophitis. Je ne doubte pas que quelques-uns n'accomparent ces propheties susdites au son des cloches, desquelles on interprete le son comme on veult &c. Les Quadrains ou propheties dudit Nostradamus, ont esté imprimez à Lyon l'an 1556. par Sixte Denyse, & encores à Paris & autres lieux, à diverses annees. Predictions pour vingtans, continuant d'an en an jusques en l'annee 1583. imprimees à Paris l'an 1567. par Guillaume Nyverd, lequel a imprimé plusieurs de ses propheties: ensemble Jaques Kerver & autres, qui ont imprimé ses Almanachs & Prognostications. Singulieres receptes pour la santé du corps humain, imprimees à Poictiers l'an 1556. Le vray & parfait embellissement de la face, & conservation du corps en son entier, contenant plusieurs receptes tres-secretes, pour le fard, le tout divisé en deux parties, imprimé à Anuers chez Plantin l'an 1557. Il dedie ce livre à son frere Jean de Nostre-Dame, Procureur en la Cour de Parlement d'Aix en Provence. Il a traduit de Latin en François la Paraphrase de Galien sur l'Exhortation de Menodote aux estudes des bons arts, & mesmement de la Medecine, &c. imprimee à Lyon chez Antoine du Rosne l'an 1557. Je n'ay pas cognoissance de ses autres escrits. Il mourut l'an 1566. en Juillet âgé de 62. ans. 6. mois & 17. jours, comme j'ay apris par son Epitaphe lequel a esté fait sur sa mort. Il se trouve protraict en l'an de son âge 59. & de salut 1562. sa devise estoit Foelixovivm prior aetas.