B. L. NICOLAS DU MONT, natif de la ville de Saumur en Anjou, Correcteur de livres en l'Université de Paris, homme docte, & extremément laborieux. Cettui-cy encores qu'il n'eust rien mis par escrit, merite pour la peine & diligence qu'il prend à l'impression des bons livres, d'estre mis en ce rang. Il a conduit & dressé la meilleure partie des copies & ouvrages, qui se sont imprimez en ladite ville de Paris, depuis douze ou quinze ans en ça, en toutes langues & professions, & encores y est aujourd'huy tellement occupé, que malaisément luy est-il loisible de respirer, comme sçavent tous ceux qui le cognoissent. Il a toutesfois escrit à heures desrobees les traitez qui s'ensuivent. Discours sommaire du regne de Charles neufiesme Roy de France tres-chrestien. Ensemble de sa mort, & d'aucuns de ses derniers propos, imprimé par Jean de Lastre 1574. Advertissement venu de Rheims, du sacre, coronnement & mariage de Henry 3. tres-chrestien Roy de France & de Pologne. Avec un Epithalame, imprimé par Denis du Pré 1575. Salutation à la Roine de France Loyse de Lorraine, sur son arrivee & bien-venuë à Paris, le 27. de Fevrier, 1575. imprimee par Denis du Pré en ladite annee. La nouvelle conqueste des villes de Thunis, & de Biserte, faicte sur les Turcs & Mores, par le Seigneur Dom Jouan d'Austrie, au mois d'Octobre dernier, imprimee chez Iean Dallier 1573. Extraict des lettres d'un gentilhomme de la suite de Monsieur de Rambouillet, Ambassadeur du Roy au Royaume de Polongne, à un seigneur de la cour, touchant la legation dudit seigneur & autres choses memorables observees en son voyage, de Cracouie le 12. de Decembre 1573. imprimé par Denis du Pré. Congratulation & resjouïssance sur la grande & inesperee nouvelle advenuë de l'election de Monsieur frere du Roy, au Royaume de Pologne, imprimee à Paris par Denis du Pré 1573. Les honneurs & triomphes faicts au Roy de Pologne, tant par les Princes Allemands en son voyage, que par ses subjects à sa reception: qui fut à Miedzeris le 24. jour de Janvier dernier passé 1574. briefvement recitee par une lettre missive, qu'un gentilhomme François escrit de Posnanie, imprimez par Denis du Pré 1574. Les obseques & funerailles de Sigismond Auguste, Roy de Pologne dernier defunct: Plus l'entree, sacre & coronnement de Henry à present Roy de Pologne: le tout fait à Cracouie, ville capitale dudit Royaume, au mois de Fevrier 1574. & recité par deux lettres missives d'un gentilhomme François, imprimees par Denis du Pré 1574. L'entree, sacre & coronnement de Henry à present Roy de Polongne: le tout fait à Cracouie, ville capitale dudit Royaume, & recité par une lettre missive d'un gentilhomme François, imprimé par Denis du Pré 1574. La declaration des seigneurs de Pologne, pour le retour du Roy en France, ensemble une Ode au Roy, sur le mesme subject, imprimé par Denis du Pré 1574. La reception du Roy par l'Empereur Maximilian, & l'Archeduc Ferdinand, & les Venitiens, imprimee par Denis du Pré 1574. L'arrivee du Roy en France, & la reception de sa Majesté par la Roine sa mere, & messeigneurs le Duc d'Alençon & le Roy de Navarre, avec un sommaire discours des principales choses survenues depuis son partement de Venise, imprimé par Denis du Pré 1574. Les feux de joye faits à Paris, pour l'arrivee du Roy en France, avec l'ordre tenu à son entree & reception en la ville de Lyon, en Septembre 1574. imprimez par Denis du Pré. Resjouïssance sur la paix, & cessation des armes, imprimee chez ledit du Pré. Il a traduit de Latin en François, la harangue de Monsieur le Cardinal de Lorraine, prononcee au Concile de Trente, avec la response, imprimee par Jaques Macé. La reigle du tiers ordre de S. François, imprimé chez Nicolas Chesneau. De la vie & moeurs des Empereurs, recueillies des oeuvres de Sextus Aurelius Victor, depuis Auguste Cesar, jusques à Theodose l'Empereur, imprimees chez Claude Micard, avec l'histoire de Justin. Les exemples memorables, tant des ethniques que des chrestiens, pris & ramassé des plus approuvez autheurs, par André Eborense Portugais. Les Epistres de S. Hierome Stridonien eleües & choisies: divisees en trois livres par la diligence de Pierre Canisius, Theologien. AElian de l'histoire diverse, quatorze livres en Latin & François. Ces derniers ne sont encores imprimez. Je laisse les epistres, prefaces, avant-propos & arguments qu'il a composez & fait imprimer devant les offices de Ciceron, Virgile, Saluste & autres, avec une infinité d'Indices & Tables de livres. Il florist à Paris cette annee 1584. & est celuy qui a esté le correcteur de l'impression de cette mienne Bibliotheque des autheurs François &c.