B. L. FRANCOIS ROSE OU ROZE Parisien, docteur en Theologie à Paris, grand maistre du College Royal de Navarre, fondé à Paris, predicateur ordinaire du Roy Henry troisiesme, à present Evesque de Senlis &c. Je diray sans flaterie, l'opinion que j'ay dudict Evesque, c'est que je n'ay onques ouy homme, duquel les predications ou sermons prononcez de vive voix, me pleussent tant que ceux que je luy ay veuz faire, tant en la presence du Roy, qu'en autres endroicts de Paris, soit pour son eloquence, sa doctrine, son stil doux-coulant, & pour voir si bien suivre un subject proposé. Il se trouve peu de ses escrits François, mis en lumiere, je sçay qu'il a prononcé plusieurs oraisons funebres, lesquelles ne sont encores imprimees. Il a escrit un traicté des Genealogies, alliances, & faits illustres de la tres-illustre & tres-ancienne maison de Montmorency, imprimé à Paris l'an 1579. chez Pierre Cheuillot. Il florist cette annee 1584. & travaille sans cesse à faire valoir l'esprit que Dieu luy a donné.

B. L. GUILLAUME ROSE, docteur en Theologie à Paris, predicateur du Roy &c. ainsi appellé par plusieurs, mais il se nomme François, & avons parlé de luy cy devant à la lettre F.

B. L. GUILLAUME ROSE, natif de Chaumont en Bassigny, docteur en Theologie à Paris, Predicateur ordinaire du treschrestien Roy de France, & de Pologne Henry 3. du nom, grand maistre du college Royal de Navarre, fondé à Paris, Evesque de Senlis, &c. Je n'ay encores veu aucunes compositions Françoises dudit seigneur Evesque, mises en lumiere, si est-ce qu'il a prononcé plusieurs oraisons funebres, & a fait plusieurs tresdoctes predications devant la Majesté du Roy, & de toute sa cour, & encores en autres lieux de la ville de Paris, lesquelles ne sont imprimees. Nous avons parlé de luy icy devant, au premier alphabet de cette Bibliotheque, au fueillet 105. auquel lieu se voit une faulte à l'endroit de son nom: car nous l'avons appellé François & son nom est Guillaume, comme nous avons dit encores icy devant en autre lieu, parlant d'un autre autheur, nommé François Roze, Picard de nation: mais à la seconde edition de ce livre, celà sera corrigé, ensemble le passage, où nous avons dit, qu'il avoit composé un discours de la genealogie de la maison de Montmorency: & ce qui nous a abusé en celà, c'est qu'il y a plusieurs autheurs, ayant ce surnom de Roze, mais leurs premiers noms les font differer. Cecy soit dit pour advertissement aux lecteurs, à fin qu'ils ne se mesprennent en ces articles susdits. Il florist à Paris cette annee 1584. qui voudra voir ses loüanges bien amplement descrites, lise les Paranymphes de Michel Thyriot. Nous avons encores fait mention dudit sieur de Senlis, Guillaume Roze, au fueillet de ce livre, 154. & avons dit que c'estoit ledit François Roze, & qu'il s'appelloit ainsi, mais tout celà sera corrigé à l'autre impression de ce livre. Ce que nous escrivons peult estre trop au long, pour ceux qui ne se soucient pas de ces choses là, mais nous en parlons ainsi amplement, pour nostre interest, & pour sauver ce qui touche nostre honneur.