B. L. PIERRE VIEL, docteur en Theologie à Paris, Chanoine de l'Eglise de S. Julien du Mans (de laquelle ville il estoit natif.) &c. Il fut deputé par Messieurs du clergé du Maine, pour aller aux Estats de Blois l'an 1576. Il a traduit de Latin en François, quelques livres d'Optatus (tres-renommé entre les Theologiens) lesquels ont esté imprimez à Paris. Traicté contre la Symonie, imprimé à Paris chez Chesneau. L'instruction pour les enfans & tous autres chrestiens, imprimee à Paris chez Nicolas Chesneau l'an 1564. Il a traduit en François, les heures à l'usage du Mans, imprimees à Paris. Il a fait la version de plusieurs vies des Saincts & Sainctes de Latin en François, & entre-autres des Evesques du Mans, lesquelles sont imprimees avecques les trois volumes de l'histoire des Saincts, chez Nicolas Chesneau & autres, in fol. l'an 1577. Il mourut au Mans le Dimenche 19. jour d'Aoust l'an 1582.