FRANCOIS DE RONSSIN, sieur du Plessis Ronssin Gentilhomme du Maine, l'un des plus excellents joueurs de Luth de France, voire de toute l'Europe, grand musicien, philosophe naturel, &Poëte François, comme il se voit en quelques sonnets de sa façon, lesquels il n'a encores mis en lumiere. Il florist à Paris cette annee 1584.

RENÉ DE RONSIN, sieur du Plessis, gentilhomme du Maine, lequel je ne pourrois assez extoller pour la grande cognoissance, ou bien (pour mieux & veritablement parler) pour la perfection qu'il a au jeu du luth, & en Musique, sinon que je voulusse dire qu'il ne cede à aucun en celà, & qu'il en surpasse beaucoup des plus renommez en cette profession: s'il est ainsi qu'il ait continué sa façon de joüer comme autresfois je l'ay veu estre reputé comme la merveille & quasi miracle des plus excellents joüeurs de Luth, tant pour l'air agreable, & pour la promptitude de sa main, & encores pour le profond sçavoir de la Musique. Ce qu'il a apris avec un travail & peine inestimable: car pour parvenir à cette parfaicte cognoissance, il a fait une despense infinie, pour voyager par toute l'Europe, & encores jusques en Turquie, pour se rendre de plus en plus accomply, & satisfaire à ses desirs, en une si loüable curiosité. Je feray fin à ces loüanges, pour dire que s'il vouloit tant de bien à la France, que de luy communiquer de ses secrets sur la Musique, que il l'obligeroit à confesser son brave nourisson: mais tous sont avares de leurs plus beaux secrets, ou bien ils n'ont pas un siecle propre pour le reputer digne de leur departir & communiquer liberalement, ce qui leur a trop cousté à apprendre, & avec un si long temps. Il florist à Paris cette annee 1584. Nous avons parlé de luy cy dessus à la lettre F. l'appellant François Rousin, mais son nom est René, & celà se corrigera à la seconde edition.