B. L. JEAN LE MASLE Angevin, Enquesteur à Baugé, au pays & duché d'Anjou, homme docte en Grec & Latin, & Poëte François. Il a escrit en François un discours de l'origine des Gaulois, ensemble des Angevins & Manceaux, avec un Poëme succinct de la vie de frere Jean Porthais dit Porthasius, docteur en Theologie, de l'ordre des freres Mineurs, ou Cordeliers, &c. le tout imprimé en la ville de la Fleche en Anjou, l'an 1575. chez René Trois-mailles. Tous ces discours susdits sont escrits en vers François. Chant d'allegresse sur la mort de Gaspard de Colligny, jadis Admiral de France, imprimé à Paris chez Nicolas Chesneau l'an 1572. Les oeuvres Poëtiques dudit Jean le Masle Angevin, lesquelles il intitule Nouvelles recreations poëtiques, &c. ont esté imprimees à Paris chez Jean Poupy l'an 1579. Il a traduit de Grec en François le Criton de Platon, lequel il a commenté & annoté, imprimé à Paris chez Jean Poupy l'an 1582. Pierre du Val, Evesque de Sees en Normandie, avoit traduit ledit liure en François, il y a pres de 40. ans, lequel a esté imprimé à Paris chez Vascosan. Il peult avoir escrit d'autres oeuvres en Latin ou en François, desquelles je n'ay pas cognoissance. Il florist cette annee 1584.