LANCELOT VOISIN, OU DU VOESIN sieur de la Popeliniere, gentilhomme François né en la Gaule Aquitanique ou Guiennoise. Il a escrit l'histoire des troubles & guerres civiles advenues en France, pour le fait de la religion, depuis l'an 1555. auquel finist l'histoire ou Commentaires de Jean Sleida Alleman de nation, jusques en l'an 1581. imprimee à la Rochelle chez François Hotin ou Haultin l'an susdit 1581. en deux volumes. Faut noter que celles qui ont esté escrites par Iean le Frere de Laval, & par un nommé Piguerre sont prises en partie de laditte histoire du sieur de la Popeliniere, & que ce qu'il y a de difference, entre icelles, c'est que ils ont osté, tout ce qu'ils ont veu qui estoit au desaduantage des Catholiques, &c. Il a traduit d'Italien en François un livre des finesses & ruzes de guerre imprimé à Paris l'an 1571. chez Nicolas Chesneau. Le livre des trois Mondes, imprimé à Paris chez Pierre l'Huillier, in 4. l'an 1582. & depuis in 8. audit an. Il florist cette annee 1584.

LANCELOT DU VOESIN, sieur de la Popeliniere, gentilhomme du bas Poictou & né en la Gaule appellee des Latins Aquitaine, &c. homme autant adextre aux lettres & aux armes que celà demeure indecis, entre ceux qui ont cognoissance de la doctrine & valeur tout ensemble. Il a escrit (outre les oeuvres que nous avons cy dessus alleguees) un for docte livre plein de belles recherches & tresdignes de grande recommandation, sçavoir est un traicté du premier langage usité entre les François ou Gaulois, & les changemens d'iceluy, ensemble des mutations de la republique Françoise, avec la langue d'iceux tout ensemble: Car il y a le premier langage des François usité soubs le regne de Charles le Grand dit le Magne (duquel nous avons parlé cy dessus à la lettre de C.) lequel estoit François Alleman; ou Theutonic-Gaulois, & depuis il a esté appellé Roman ou Romain, & encores il a eu divers changemens, lesquels sont for bien rapportez au livre susdit, dudit sieur de la Popeliniere, lequel oeuvre n'est encores en lumiere, & c'est pourquoy (ne l'ayant point veu, ) je n'en peux parler en cest endroit que comme par coniecture. Il florist cette annee 1584. âgé de 40. ans ou environ, & a encores plusieurs beaux ouvrages à mettre en lumiere, tant de son invention que de sa traduction.