MARTIN FVMEE gentilhomme Parisien, sieur de Marly le Chastel, fils de monsieur des Roches Fumee, qui est une tres-noble & tresancienne famille en Touraine, de laquelle estoit Seigneur messire Adam Fumee, Chancelier de France du temps de Loys XI. l'an 1499. duquel sont descenduz tant d'illustres & sçavants hommes, comme nous dirons autre-part. Ce seigneur de Marly le Chastel, a recueilly de plusieurs autheurs Latins & François, l'histoire des Indes, laquelle il a fait imprimer à Paris l'an 1577. Je n'ay pas veu ses autres escrits. Il florissoit audit an 1577. & ne sçay s'il est encores vivant, car je n'ay pas eu ce bien que de le voir encores ou cognoistre, que par ses doctes escrits. Au demeurant je diray en passant, qu'ayant leu sa preface sur son histoire des Indes, il confesse n'avoir peu recouvrer les Navigations de Fernand ou Ferdinand Cortez Espagnol, &c. pour employer en l'histoire susditte. Mais je veux bien l'advertir, & ceux qui auroient envie voir cette histoire dudit Cortez, que je l'ay par devers moy: & leur en feray aussi tost part, comme j'ay fait par le passé, & fay encores tous les jours des livres rares qui sont en ma possession, tant je suis desireux de profiter au public, par tous honnestes moyens. Aussi que plusieurs des plus grands & doctes personnages de nostre temps n'en sont demeurez ingrats, car ils ont confessé en leurs oeuvres, avoir reçeu cette faveur de moy, que de les avoir secouruz de mes exemplaires, & livres escrits à la main. Ce que je ne repete pour la gloire qu'ils m'en ont donnee en leurs escrits, mais pour faire declaration du desir que j'ay de faire le semblable à tous autres qui auront recours à moy, en toutes choses qui seront en ma puissance.

Messire MARTIN FVMEE, seigneur de Genilly, Chevalier de l'ordre du Roy, autre que le susdit sieur de Marly le Chastel, &c. frere de Messire Adam Eumee (duquel nous avons parlé au commencement de ce livre,) & encores frere de Messire Nicolas Fumee, jadis Abbé conmendataire de l'Abbaye de la Cousture au Maine, & maintenant Evesque de Beauvais en Picardie, & Pair de France, &c. Ce seigneur de Genilly est tresdocte & tres-accomply gentilhomme. Il a composé plusieurs beaux traictez non encores mis en lumiere. Il florissoit en l'an 1575.

CHRESTOFLE DE LA FOY (surnommé le gendre du Roy Alcofribas, qui sont tous noms supposez.) Il a esté mis soubs le nom dudit Chrestofle de la Foy, un livre intitulé le mespris de la Cour, composé par M. F. gentilhomme Parisien, &c. Je ne sçay si ce livre est imprimé.)