B. L. JEAN AVBERT, sieur de la Moreliere, natif du pays & Conté du Maine. Ce seigneur de la Moreliere, est l'un des plus renommez Advocats de tout le siegle presidial du Mans, & quand je diray de tout le Maine je n'advanceray rien en celà, pour sa gloire, qu'il n'en merite encores plus: car si lon veut regarder combien il est docte & profond en la jurisprudence, & sur tout bien façonné & apris aux consultations, lon me confessera, que mesmes les voisins du Maine, soit d'Anjou, Touraine & autres lieux, s'addressent à luy en ce cas, pour recevoir son advis avant qu'entreprendre des procés & autres affaires de semblable consequence. Il n'a encores fait imprimer aucuns de ses oeuvres, & toutefois j'ay bonne cognoissance, qu'il a fait plusieurs doctes & bien curieuses observations sur le droit, & encores sur les coustumes du Maine. Il florist au Mans cette annee 1584. âgé de plus de 50. ans.