PHILIPPE DU PRAT, damoiselle Parisienne, soeur aisnee d'Anne du Prat (de laquelle nous avons fait mention cy dessus) ensemble de Madame Anne Seguier leur mere, dame de la Vergne, femme en premieres nopces, de Messire François du Prat, Baron de Thiert: duquel mariage sont issues laditte Philippe & Anne, toutes deux ne degenerent en rien du sçavoir de leur mere: car elles sont tellement ornees d'une rare literature, & ont l'esprit si clair-voyant, (sans que je face icy mention de la cognoissance qu'elles ont en la poësie & art oratoire, jusques à là que d'escrire, & parler en Latin) que c'est chose bien digne de recommandation, & qui merite que leur nom s'estende aussi loing, comme je me asseure que leurs escrits & doctes compositions leur acquerront de renommee. Elles n'ont encores fait imprimer leurs compositions, soit en prose ou en vers, mais j'ay opinion qu'elles porteront tant de faveur à noz François, que de les leur communiquer, & les en faire participans. Elles florissoient à Paris cette annee 1584.

PHILIPPES DE VICTRAY, Evesque de Meaux pres Paris, ancien Poëte François. Il a escrit quelques poësies en nostre langue, lesquelles ne sont pas imprimees. Nicolas de Clemagis, en a traduit quelques-unes en Latin. Ledit Evesque florissoit il y a plus de cent ans.