B. L. JEAN PIERRE DE MESMES Parisien, fils naturel (comme l'asseurent aucuns) de Messire Jean Jaques de Mesmes, pere de Messire Henry de Mesmes, sieur de Roissy & Malassise, desquels nous avons parlé cy dessus. Il estoit bien versé en plusieurs arts & sciences, & avoit cognoissance de beaucoup de langues estrangeres. Il a traduit plusieurs livres d'italien en François, & entre-autres quelques livres de Mathematiques, esquelles il estoit bien versé. Il est autheur d'une grammaire Italienne & Françoise, imprimee à Paris chez Gilles Corrozet l'an 1548. & l'an 1567. chez Robert le Mangnier, en laquelle il n'a pas voulu mettre son nom: mais ce qui m'a fait cognoistre qui en estoit l'autheur, ç'a esté une sienne devise mise sur la fin de ladite Grammaire Italienne, qui est telle, Per me steßo son saßo, laquelle expliquee en François, signifie De moy-mesmes je suis Pierre, qui est un equivoque ou allusion sur son nom & surnom, Pierre de Mesmes, comme s'il eust voulu dire je suis Pierre de Mesmes, qui ay composé cet ouvrage. Ce que j'ay recité assez amplement à cause de plusieurs qui n'ont pas cognoissance, ny de l'autheur de cette Grammaire Italienne & Françoise, ny de cette devise. Car s'il eust mis son nom par lettres capitales ou maiuscules en cette façon J. P. D. M. plusieurs eussent pensé que c'eust esté le nom de Jaques Peletier du Mans, tant cogneu par ses oeuvres, & plusieurs ont eu opinion que les vers Italiens mis au tombeau de Madame Marguerite Roine de Navarre, soeur du Roy François premier, soubs ces lettres susdites signifiassent le nom dudit Peletier, mais leurs devises les ont fait recognoistre, car ledit Jean Pierre de Mesmes à cette-cy en Latin, Coelum non solum, & Peletier à cette autre Françoise, Moins & Meilleur: mais c'est trop s'arrester sur ce point, il faut voir quels autres oeuvres a composez ledit Jean Pierre de Mesmes. Il a escrit en vers François, un Epithalame sur le mariage de Henry de Mesmes, sieur de Malassise, & Ieanne Hannequin sa femme, imprimé à Paris l'an 1552. avec un discours de l'origine ou extraction des sieurs de Mesmes, seigneurs de Roissy &c. Ledit Jean Jaques de Mesmes florissois à Paris l'an 1556.