B. L. MAVRICE PONCET, docteur en Theologie en l'Université de Paris, religieux de l'ordre de S. Benoist, homme for docte, & des plus hardis predicateurs de ce siecle: car il a tellement le zele de la religion chrestienne en recommandation, qu'il ne craint aucunement de reprendre toutes sortes de vices, desquels il peut avoir cognoissance, sans respecter en celà aucun quel qu'il soit, tant il est ardant à reprendre, & hardy pour enseigner, & desireux que lon se corrige des faultes que lon commet chacun en son estat. Il a escrit & composé en François, une oraison funebre, sur la mort de Messire Eustache de Conflans, Viconte d'Auchy, laquelle il prononça le dernier jour d'Aoust l'an 1574. en l'Eglise de Brecy le Buisson. Elle a esté imprimee à Paris chez Michel Somnius audit an 1574. Remonstrance à la Noblesse de France, de l'utilité & repos que le Roy apporte à son peuple, & de l'instruction qu'il doibt avoir pour le bien gouverner, imprimé à Paris chez ledit Somnius l'an 1572. Je n'ay pas cognoissance de ses autres escrits François, & quant à ses Latins, nous en ferons mention autre-part. Il florist à Paris cette annee 1584. non sans se travailler beaucoup à prescher & annoncer au peuple la parole de Dieu.