B. L. GUY PECATE, dit en Latin Pacatus, natif de la paroisse de sainct Remy du Plain, pres Dompfront au Maine, autresfois Prieur de Sougé, & curé de Spay, & en fin secretain en l'Abbaye de Cousture pres le Mans, de laquelle il estoit Religieux profez.) &c. Je serois bien digne d'estre blasmé, de ceux qui ont cognoissance de la doctrine & sçavoir qui estoit en ce personnage, & encores plus digne d'estre accusé d'ingratitude, pour la grande amitié qu'il m'a portee durant sa vie, si je ne declarois icy ce que j'ay cogneu de recommandable en luy: car en premier lieu il estoit si bien versé en plusieurs arts & bonnes disciplines, & sur tout en la poësie Latine, qu'il a esté admiré de son temps, pour ses doctes compositions, & principalement de Ronsard, Prince des Poëtes François, son plus grand amy, lequel a fait treshonorable mention de luy en ses poësies, & advoüe avoir eu intelligence des Poëtes Latins, par son moyen: (sans vouloir icy oster l'honneur deu à monsieur d'Aurat.) Il n'a point fait imprimer ses oeuvres & compositions Latines, ou Françoises. Il mourut en la susditte Abbaye de la Cousture le Mardy 5. jour de Juillet l'an 1580. en laquelle il fut enterré le jour ensuyvant. Je feray mention plus ample de luy & de ses escrits Latins, autrepart.