B. L. MICHEL BVREAV, natif de la paroisse de Champ-genesteux, au bas pays du Maine, Abbé de la Cousture pres le Mans, docteur en Theologie à Paris, Evesque de Hieropole. Il a prononcé plusieurs harangues devant les Rois de France, & a dressé plusieurs memoires touchant la police & lustice, lesquels ne sont encores imprimez, non plus que son livre Latin, qu'il a intitulé De Libertate Ecclesiastica, lequel nous avons par devers nous escrit à la main. Guillaume le Rouillé d'Alençon en fait mention en ses annotations, sur les Coustumes du Maine, & parle de luy en termes honorables. Il mourut au Mans en son Abbaye de la Cousture, le sixiesme jour de Juin l'an 1518. & est enterré en icelle. Le proverbe qui est en usage (principalement au Maine) a pris son origine de luy, qui est tel, Bureau vault bien Escarlate, ou bien Le Bureau est aussi fin qu'Escarlate. Ce qui fut dit par luy, comme en colere, parlant avec Monsieur le Cardinal de Luxembourg, Evesque du Mans l'an 1518. lors qu'ils avoyent procez ensemble, touchant leurs Jurisdictions, en quoy lon voit l'equivoque de son nom Bureau, pour Blanchet, & drap non teint avec une allusion sur l'habit de Cardinal, qui est d'escarlate, estimee la plus riche couleur ou teinture en draps de laine. Ce que j'ay dit comme en passant, à cause que plusieurs ne sçavent que veult dire ce proverbe susdit.