B. L. JEAN GLAPION, natif de la ville de la Ferté-Bernard, au Conté du Maine, à dix lieuës de la ville du Mans &c. religieux de l'ordre des freres Mineurs, ou Cordeliers, jadis Ministre Provincial de Belges, docteur en Theologie, & confesseur de l'Empereur Maximilian l'an 1520. Il a escrit plusieurs livres, tant en Latin qu'en François, soit en prose ou en vers: Il a prononcé plusieurs oraisons & sermons, devant ledit Empereur son maistre, & entre-autres celuy qu'il fist du jour des Cendres sur le Pater noster &c. recueilly par Nicolas VolKIR, dit le Poligraphe (duquel nous parlerons cy apres) & l'a fait imprimer avec ses autres oeuvres l'an 1523. Il mourut d'une disenterie en la ville de Valdoly en Espagne, au Royaume de Castille l'an 1522. le 14. jour de Septembre, comme j'ay leu dans l'Epitaphe fait sur sa mort par ledit VolKir. Erasme se moque & fait un discours plain de risee dudit Iean Glapion confesseur de l'Empereur, ne le voulant nommer de son nom, mais seulement le donnant à cognoistre par son pays & par ses qualitez, ce quelon pourra voir en son livre, intitulé Ciceronianus dialogus, ou de la prononciation &c. fol. 135. de l'impression de Gryphius à Lyon l'an 1528. & repete en cet endroit-là, la mauvaise grace qu'eut ledit Glapion Manceau, en prononçant une oraison Latine devant l'Empereur Maximilian, laquelle il dit qu'un Italien avoit faite &c. & toutesfois ledit Erasme au catalogue de ses livres, le louë grandement & l'appelle son amy &c. J'ay dit cecy en passant & selon que l'amour du pays me l'a fait faire: car ledit Glapion estoit voisin de la seigneurie de la Croix-au Maine, & le respecte pour avoir esté homme de lettres, comme je fay tous autres ses semblables, quoy qu'Erasme l'ait voulu blasonner: Et croy que c'estoit plustost pource qu'il estoit Cordelier que pour autre raison, car il en a tousjours voulu à ceux-là, sur tous autres, comme il a assez donné à cognoistre en ses Colloques & autres lieux de ses oeuvres.