MARGUERITE DE FRANCE, Royne de Navarre, fille de Henry 2. du nom, & soeur de Charles 9. & Henry troisiesme, à present Roy de France, &c. Si j'ay mis cette Dame & tres-illustre Princesse, apres les autres de ce nom de Marguerite, ç'a esté pour observer l'ordre alphabetiq, ou d'a, b, c, lequel je me suis proposé de suivre en ce Recueil d'hommes & femmes illustres, afin d'eviter tout soubçon de flaterie, & pour ne fascher aucun. Que s'il m'eust esté permis d'user en en cecy de ma volonté, j'eusse mis cette Dame, au premier rang: car si je ne veux demeurer ingrat de tant de faveur qu'il a pleu à sa Majesté de me porter, (sans luy avoir jamais fait service aucun, & sans avoir eu ce bien que d'estre au nombre de ses domestiques, & serviteurs ordinaires: ou bien pour ne luy avoir jamais donné occasion d'user d'une si grande courtoisie en mon endroit.) Il fault que je confesse qu'elle m'a tant honoré de sa bonté accoustumee, que d'avoir voulu prendre la peine de faire entendre mes desseings & projects au Roy de France tres-Chrestien Henry 3. son frere, & les luy recommander sur tout, afin que celà le rendist de plus en plus renommé par l'Univers, & pour emporter le bruit d'estre un Prince qui eust plus advancé les lettres, que pas un de ses devanciers Roys de France & autres: enquoy il y a une rencontre tresmemorable en cecy. Car une de mesme nom & surnom, de mesme lignee, toutes deux Roines de Navarre, soeurs des Roys de France, & toutes deux aimants les lettres, sçavoir est Madame Marguerite de France ou de Valois, Roine de Navarre, soeur du Roy François 1. pere des lettres, avoit esté cause que Jules Camile Italien, entra en la faveur & cognoissance dudit Roy François & cette Dame susditte a pris toutes les peines qu'il luy a esté possible, de faire entendre au Roy son frere (mon Prince souverain) tous mes desseings, en intention qu'il les acceptast, tant elle desiroit de voir croistre l'honneur du Roy, & qu'il ne cedast en rien à celuy de son grand pere, le Roy François 1. duquel la renommee ne perira jamais, tant que les lettres & sciences auront cours & duree: desquelles choses je feray plus ample mention autre-part. Mais pour dire un mot de ce Jules Camile, je veux que l'on sçache qu'il n'a escrit qu'une cabale pour la Memoire, c'est à dire, une science particuliere, & comme baillee de main en main, pour aprendre à retenir beaucoup de choses desquelles on desireroit avoir cognoissance, & que l'Idee de son theatre, imprimee en Latin & en langue Italienne, n'est pas semblable aux desseings & projects que j'ay presentez au Roy. Car je monstre par effects & par livres, que je mets à fin mes entre prises: jusques à là que d'en avoir escrit & recueilly sept ou huit, cent volumes de memoires sur toutes choses, traictans de tous arts, toutes matieres, toutes langues, & toutes disciplines, voire jusques à n'avoir rien obmis de ce qui appartient aux arts Mechaniques, & pour dire en un mot, n'ayant laissé chose aucune, de laquelle les hommes puissent avoir cognoissance, dont je n'aye traicté en ce grand nombre de volumes, contenant plus de trente mille cayers ou chapitres, comme j'ay dit cy devant parlant de moy, & de mes escrits, mais pour ne vouloir par trop estendre mon discours, j'advertiray ceux qui auront volonté de voir ces choses plus amplement, d'avoir recours à ce que j'ay escrit bien au long sur la fin de cette Bibliotheque Françoise, auquel lieu j'ay parlé amplement dudit Camille, & de sa vie. Mais pour revenir à parler de la tres-illustre Royne de Navarre, j'oseray asseurer (sans que les faveurs & bien-faits que j'ay receuz de sa Majesté, soient causes de me le faire ainsi laisser par escrits) qu'elle est ornee d'un tel & si divin esprit, & qu'elle est si docte & tant eloquente, qu'elle ne cede en rien, mais surpasse toutes celles, qui sont en reputation d'estre bien nourries aux lettres: & ce qui est le plus à admirer en cecy, c'est qu'elle a plus de science nee avecques elle, que par acquisition ou industrie. Elle florist cette annee 1584. & prie Dieu vouloir luy donner sa grace.